ट्रायल पास भएपछि अब के गर्ने? जान्नैपर्ने पूर्ण प्रक्रिया
सवारी चालक अनुमतिपत्र (ड्राइभिङ लाइसेन्स) को प्रयोगात्मक परीक्षा (Trial) सफलतापूर्वक पास हुनुभएका सम्पूर्ण सेवाग्राहीहरूलाई बधाई छ। ट्रायल पास भइसकेपछि भौतिक स्मार्ट कार्ड हातमा नपरुन्जेलसम्म तपाईंले गर्नुपर्ने कानुनी तथा प्रशासनिक चरणहरू तल स्पष्ट रूपमा उल्लेख गरिएको छ:
१ राजस्व भुक्तानी (सक्कल रातो रसिद लिने)
समयसीमा: ट्रायल पास भएको २–३ कार्यदिनभित्र यस कार्यालयमा उपस्थित भई तोकिएको सरकारी राजस्व बुझाउनु पर्नेछ।
आवश्यक कागजातहरू:
– ट्रायल पास गर्दा प्राप्त भएको परीक्षाको सक्कल चिट/रसिद
– नागरिकताको प्रमाणपत्र (सक्कल)
मुख्य नोट: राजस्व बुझाइसकेपछि तपाईंले कार्यालयबाट सक्कल रातो रसिद (Red Receipt) पाउनुहुनेछ। यस रसिदलाई अत्यन्तै सुरक्षित राख्नुहोला।
२ रातो रसिदबाटै सवारी साधन चलाउने (कानुनी मान्यता)
वैध अनुमतिपत्र: स्मार्ट कार्ड प्रिन्ट भई आउन समय लाग्ने हुनाले, यातायात व्यवस्था ऐन अनुसार तपाईंले प्राप्त गर्नुभएको यो सक्कल रातो रसिद नै तपाईंको आधिकारिक लाइसेन्स हो।
चेकिङमा सहजता: भौतिक कार्ड नआउँदासम्म ट्राफिक प्रहरीको चेकिङमा यही सक्कल रातो रसिद देखाएर तपाईंले नेपालभर ढुक्कसँग सवारी साधन चलाउन सक्नुहुन्छ।
३ नागरिक एप (Nagarik App) मा लाइसेन्स लिङ्क गर्ने
डिजिटल लाइसेन्स: राजस्व बुझाएको केही दिनपछि तपाईंको डाटा केन्द्रीय सर्भरमा सिंक (Sync) हुन्छ। त्यसपछि तपाईंले आफ्नो मोबाइलको नागरिक एपमा गई 'सवारी चालक अनुमतिपत्र' सेक्सनमा आफ्नो लाइसेन्स नम्बर राखेर डिजिटल रूपमा लिङ्क गर्न सक्नुहुन्छ।
यो डिजिटल लाइसेन्स पनि आकस्मिक चेकिङको समयमा पूर्ण रूपमा मान्य हुन्छ।
⚠️ महत्वपूर्ण जानकारी: नागरिक एप वा विभागको वेबसाइटमा लाइसेन्सको स्थिति 'Printed' देखाए तापनि हाम्रो यस कलंकी कार्यालयको आफ्नै आन्तरिक प्रणालीमा दर्ता नभईकन कार्ड लिन कार्यालय नधाउनुहोला। विभागबाट प्राप्त भएका कार्डहरूलाई प्राविधिक टोलीले रुजु र दर्ता गरिसकेपछि मात्र वितरण सुरु हुन्छ।
४ अनलाइन रेकर्ड रुजु गर्ने र भौतिक कार्ड बुझ्ने
तपाईंको भौतिक स्मार्ट कार्ड यातायात व्यवस्था विभागबाट छपाइ भई यस कार्यालयको कार्ड शाखाको सुरक्षित बक्समा आइपुगेको छ कि छैन भनी घरमै बसेर यकिन गर्न सक्नुहुन्छ।
कार्यालय आउनुअघि अनिवार्य रूपमा तलको बटनमा क्लिक गरी आफ्नो लाइसेन्स नम्बर राखेर रेकर्ड खोजी गर्नुहोला:
